Samsung kompaniyasi tomonidan oʻtgan yili ishlab chiqarilgan va yaxshigina shov-shuvlarga sabab boʻlgan Galaxy Buds FE simsiz quloqchinlari turkiyalik qizning qulogʻida portlab ketdi.

Adanada yashovchi fuqaro oʻzining ijtimoiy tarmoqlardagi “Boyazid” nomi bilan qoldirgan postida yozilishicha, u quloqchinni sotib olgach uni quvvatlashga ham qoʻymagan va 36 foiz zaryadi borligini koʻrib, undan ishlatib koʻrmoqchi boʻlgan.

Xabarda yozilishicha, yigit quloqchinni 24 yoshli qiz doʻstining qulogʻiga qoʻyishga urinayotganda, eshitish vositasi toʻsatdan portlab ketgan va buning natijasida sherigining chap qulogʻi doimiy eshitish qobiliyatini yoʻqotgan.

Voqea sodir boʻlganidan keyin qiz kasalxonaga yotqizilgan. Uning eshitish qobiliyatining yoʻqolgani shifokordan olingan tahlil xulosasi bilan tasdiqlangan.

Shundan soʻng, Boyazid Samsungʼning Turkiyadagi boʻlimi bilan bogʻlangan va voqeani boricha gapirib bergan. Qurilmani olib ketgani kelgan kompaniya xodimlari yigitdan uzr soʻragan. Biroq Boyazidning aytishicha, xodimlar hisobotda quloqchinning “portlab ketgan”i oʻrniga shunchaki “deformatsiyaga uchragan” deya yozib qoʻygan. Buni koʻrgan yigit oʻz noroziligini bildirgan.

Kompaniya isteʼmolchining zararini qoplash uchun yana yana Galaxy Buds FE'ni taklif qilgan. Boyazid esa bu taklifni rad etgan. Kompaniya esa bundan ortiq yordam berolmasligini maʼlum qilgan.

Boyazid ijtimoiy tarmoqqa joylagan ushbu xabari orqali omma eʼtiborini tortib, odamlardan unga yordam berishini iltimos qilgan.