Oʻzbekiston Respublikasi Tashqi ishlar vazirligi Isroil-Falastin mojarosi boʻyicha bayonot berdi. Bayonotda vazirlik mavjud vaziyatda tinch aholi orasida koʻplab qurbonlar uchrayotganidan xavotirdaligini bildirgan.

“Oʻzbekiston Respublikasi Tashqi ishlar vazirligi Falastin-Isroil mojarosi hududida tinch aholi orasida koʻplab qurbonlarga olib kelgan va butun Yaqin Sharqdagi vaziyatni sezilarli darajada murakkablashtirgan holat keskinlashganidan jiddiy xavotir bildiradi.

Biz kurashayotgan tomonlarni qurolli qarama-qarshilikni tez fursatlarda tugatish va inqirozni siyosiy hamda diplomatik vositalar orqali hal qilish uchun barcha choralarni koʻrishga chaqiramiz”, – deyiladi bayonotda.

Bundan tashqari, vazirlik soʻnggi voqealarda halok boʻlganlarning oila aʼzolariga chuqur hamdardlik bildirgan va barcha jarohatlanganlarning tezroq sogʻayib ketishini tilagan.