Ekologiya, atrof-muhitni muhofaza qilish va iqlim oʻzgarishi vazirligi huzuridagi “Hisor” davlat qoʻriqxonasi xodimlari tomonidan oʻrnatilgan videoqopqonga Sibir togʻ echkisi muhrlandi. Bu haqda vazirlik matbuot xizmati xabar berdi.

Sibir togʻ echkisi Oʻzbekiston Qizil kitobiga kiritilgan boʻlib, asosan, chiqish qiyin boʻlgan baland togʻlarda yashaydi. Ular oʻrtacha 15-17 yil umr koʻradi va yilda 1-2 marta bolalaydi.

“Hisor” davlat qoʻriqxonasi bu jonivorlarning doimiy maskanidir. Sibir togʻ echkisi Ekologiya vazirligi tomonidan doimiy muhofazaga olingan.