Oʻzbekiston Fanlar akademiyasi akademigi, taniqli fizik olim Nazar Toʻrayev 3-oktabr kuni 85 yoshida vafot etdi. Bu haqda Oʻzbekiston Fanlar akademiyasi xabar berdi.

Toʻrayev 1938-yili Denov tumanida tugʻilgan. Nazar Toʻrayev Oʻzbekistonda xizmat koʻrsatgan fan arbobi (1988) unvoniga, fizika-matematika fanlari doktori (1980), professor (1982) ilmiy darajalariga ega boʻlgan.

Nazar Toʻrayev atom zarralarning qattiq jismlar sirtida sochilishi nazariyasi, ionlarning birlamchi va ikkilamchi sochilishiga oid sohalarda ilmiy izlanishlar olib borgan. U Oʻzbekistonda birinchi boʻlib nazariy fizika masalalarini kompyuterda algoritmlab yechishni amalga oshirgan.

Toʻrayev lazer nuri bilan qishloq xoʻjalik ekinlari urugʻlarini nurlantirish ilmiy laboratoriyasining asoschilaridan biridir.

Akademik 1990-1995-yillarda Oliy Kengash deputati boʻlgan. 1998-yilda “Mehnat shuhrati” ordeni bilan mukofotlangan.