Osiyo oʻyinlarida -68 kg vazn toifasida ishtirok etgan taekvondochi Ulugʻbek Rashidov Oʻzbekiston jamoasiga navbatdagi oltin medalni taqdim etdi.

U turnirdagi ishtirokini hongkonglik Lo Vay Fungni 14:1, 16:4 hisoblarida taslim etish bilan boshladi.

Chorakfinalda Taybey vakili Yi Jui Chiuga qarshi bahsda 13:0, 17:4 hisoblarida magʻlub etdi.

Yarimfinalda taekvondo vatani hisoblangan va turnirda ham eng koʻp medallar jamgʻarayotgan Janubiy Koreya jamoasi vakili Jin Hojun ustidan 16:9, 16:7 hisoblarida gʻalaba qozondi.

Finalda esa iordaniyalik Abdulkarim Zaidga hech qanday imkoniyat qoldirmadi — 14:6, 13:9.

Oʻzbekiston jamoasining yana bir vakili Feruza Sodiqova esa kumush medalga ega chiqdi.

Hozirda Oʻzbekiston jamoasi umumiy reytingda 4-oʻrinda bormoqda. Jamoa hisobida 6 oltin, 7 kumush, 11 bronza mavjud.