Oʻzbekiston hududiga Eronning tropik havosi kirib kelishi natijasida ushbu hafta davomida respublika boʻyicha juda issiq ob-havo kuzatildi.

“Oʻzgidromet”ning xabar berishicha, 11-iyulda Qoraqalpogʻiston Respublikasi va Xorazm viloyatida, 12-13-iyul kunlari qolgan hududlarda havo harorati +40...+42 darajagacha, shimolda, janubda va choʻl hududlarda baʼzi joylarda +43...+45 darajagacha, Qizilqum choʻlining gʻarbida baʼzi joylarda +46 darajagacha koʻtarildi.

Biroq kuchli issiq davr uzoq davom etmadi. 13-iyul kunidan boshlab respublikaning shimoliy-gʻarbiy hududlariga Kavkaz hududlaridan nisbatan salqin havo kirib kelishni boshladi va ushbu hudud boʻyicha harorat +5...+7 darajaga pasaydi.

Maʼlum qilinishicha, bugun Kavkazdan kirib kelayotgan havo respublika hududi boʻyicha harakatini davom ettiradi va barcha joylarda issiq zaiflasha boshlaydi. Bugun kunduzi havo harorati +35...+39 darajani tashkil etadi, eng chekka janubda +41...+44 darajagacha boʻladi. Dam olish kunlari respublika hududining katta qismida harorat +33...+38 daraja atrofida boʻladi, faqat baʼzi joylarda +39...+40 darajaga yetadi.

14-16-iyul kunlari respublikaning barcha hududlari boʻyicha asosan quruq va kam bulutli ob-havo boʻlishi kutilmoqda. Baʼzi joylarda shamol tezligi 15-20 m/s gacha yetishi, ayrim joylarda chang-toʻzon bilan kuzatilishi mumkin.

Poytaxtda 14-16-iyul kunlari asosan kam bulutli ob-havo boʻladi, yogʻingarchilik kutilmaydi. Sharqiy shamol yoʻnalishini oʻzgartirib, gʻarbdan 3-8 m/s tezlikda esadi, 14-iyul kechga tomon va 15-iyulda 12-15 m/s gacha kuchayishi, ayrim joylarda chang-toʻzon bilan kuzatilishi mumkin. Bugun kunduz kuni harorat +37...+39 daraja, dam olish kunlari +35...+38 daraja boʻladi.

Oyina.uzʼni Telegramda oʻqing!