Qatar Amiri shayx Tamim bin Hamad Ol Soniy 5-iyun kuni davlat tashrifi bilan O‘zbekistonga keldi.

Samarqand aeroportida Qatar amirini bu yerga avvalroq kelgan O‘zbekiston Prezidenti Shavkat Mirziyoyev kutib oldi.

Oliy martabali mehmon sharafiga ikki davlatning davlat bayroqlari ko‘tarilib, faxriy qorovul saf tortdi.

Davlat rahbarlari shohsupaga ko‘tarildilar. Milliy qo‘shiq va raqslar ijrosida tantanali marosim bo‘lib o‘tdi.

Tashrifning asosiy tadbirlari 6-iyunga belgilangan. Bugun ikki davlat rahbarlari Samarqandning diqqatga sazovor joylarini ziyorat qiladilar.