Kecha, 9-may kuni soat 21:25 da Samarqand viloyati Paxtachi tumani «Yangiobod» MFYda joylashgan tumangaz korxonasi hududida yong‘in portlash sodir bo‘layotganligi to‘g‘risida FV bo‘limiga xabar tushgan.

Shunga ko‘ra yong‘in-qutqaruv ekipajlari voqea joyiga yetib borib, xozirda yong‘in bartaraf etildi. FVV axborot xizmati hodisa yuzasidan qo‘shimcha ma’lumot berdi.

Yong‘in oqibatida gaz quyish shaxobchasi hududida bo‘lgan 3 ta Isuzu avtomashinasi va ularda sig‘imi 50 litrli suyultirilgan uglevodorod gazlari bo‘lgan ballonlar yonib zararlangan.

Hodisa shoxobchadagi MAN rusumli suyultirilgan gaz tashuvchi avtomashinadan gazni zaxira sig‘imiga bo‘shatish jarayonida texnika xavfsizligi qoidalarining buzilishi oqibatida yuzaga kelgani taxmin qilinmoqda.

Dastlabki ma’lumotlarga ko‘ra, hodisa oqibatida bir nafar fuqaro tan jarohati olgan. Hozirda vaziyat oqibatlarini bartaraf etish ishlari olib borilmoqda. Voqea joyiga FVV, IIB, SSB va tegishli tashkilotlar xodimlari yetib borgan.