Gʻalla yetishtirish va sotishda erkin raqobatni taʼminlaydigan bozor tamoyillarini joriy etish toʻgʻrisidagi Prezident qarori qabul qilindi.

Qarorga muvofiq, 2022-yildan ekishga tavsiya etilgan bugʻdoy navlari xoʻjalik yurituvchi subyektlar tomonidan mustaqil joylashtiriladi.

2022 – 2024-yillarda klasterlar va fermerlar yetishtirgan hosilining gʻalla ekilgan har gektar maydon hisobidan oʻrtacha 2,5 tonnadan bugʻdoyni erkin birja savdolari orqali, qolgan qismini toʻgʻridan-toʻgʻri shartnomalar asosida erkin sotadi.

Har yili 1-avgustgacha bugʻdoyning kelgusi yil hosili uchun kutilayotgan indikativ narx OAVda eʼlon qilinadi.

Davlat boshqaruvi organlari, hokimliklar va huquqni muhofaza qiluvchi organlariga quyidagilar taqiqlanadi:

imtiyozli kreditlardan foydalanish yoʻnalishlariga aralashish;

bugʻdoyni sotish, shartnomalar tuzish, respublika hududlari oʻrtasidagi ichki tashuvlarga aralashish;

gʻallachilik klasterlariga chorvachilik, parrandachilik, baliqchilik va boshqa yoʻnalishlarni qoʻshish toʻgʻrisida yozma yoki ogʻzaki tartibda koʻrsatma berish.

2021 – 2022-yillarda «Oʻzdonmahsulot» AK tizimidagi don korxonalari tadbirkorlarga sotiladi.