O‘zbekiston va Ozarboyjon ekspert-tahlil doiralari vakillari o‘rtasida teleko‘prik uyushtirildi, deb xabar bermoqda «Dunyo».

Tadbir davomida ishtirokchilar O‘zbekistonda turli sohalarda amalga oshirilayotgan islohotlar muvaffaqiyatiga o‘z baholarini bildirdi, O‘zbekiston-Ozarboyjon munosabatlarining bugungi holati va ularni yanada rivojlantirish yo‘llari haqida o‘zaro fikr almashdi.

Ekspertlar o‘z chiqishlarida 23-24-fevral kunlari Toshkent shahrida bo‘lib o‘tadigan mintaqalararo forumning davlatlararo munosabatlarni yanada rivojlantirishdagi o‘rni va ahamiyatini alohida ta’kidladi.

Elchixona ma’lumotlariga ko‘ra, O‘zbekiston diplomatiya vakolatxonasi tomonidan tashkil etilgan ushbu tadbir haqidagi xabar-maqola va videomateriallar Ozarboyjon ommaviy axborot vositalarida atroflicha yoritildi.