Oʻzbekistonlik shaxmatchilarning soʻnggi bir yil davomida xalqaro arenalardagi sensatsion gʻalabalari ortidan Oʻzbekiston – yilning eng yaxshi shaxmat mamlakati deb eʼtirof etildi.

Niderlandiyadagi xalqaro turnir yakunida Nodirbek Abdusattorov va Javohir Sindorov yilning eng yaxshi shaxmat mamlakatiga topshiriladigan “Tour Dʼor” — “Oltin minora” sovrinini qabul qilib olishdi. Oʻzbekiston shaxmat federatsiyasiga Yevropaning shaxmat sovrinini fransiyalik mashhur grossmeyster Bashar Kuatli topshirdi.

Eslatib oʻtamiz, Oʻzbekiston 2022-yilda Hindistonning Chennay shahrida boʻlib oʻtgan 44-Butunjahon shaxmat Olimpiadasida birorta ham magʻlubiyatga uchramagan yagona jamoa boʻlib, 188 jamoa ishtirok etgan musobaqa chempioniga aylandi.