Prezidentning “Nurafshon davlat universiteti faoliyatini tashkil etish chora-tadbirlari toʻgʻrisida”gi qarori loyihasi eʼlon qilindi.

Oliy taʼlim vazirligi, Iqtisodiy taraqqiyot vazirligi hamda Toshkent viloyati hokimligining Nurafshon shahrida Nurafshon davlat universitetini tashkil etish toʻgʻrisidagi taklifiga rozilik beriladi.

Quyidagilar universitet asosiy faoliyat yoʻnalishlari etib belgilanadi:

hududda pedagogika, iqtisodiyot, transport logistikasi sohalari rivojlanish istiqbollari va ustuvor vazifalarini, zamonaviy texnika hamda texnologiyalar rivojlanish tendensiyalarini hisobga olgan holda ehtiyoj yuqori boʻlgan mutaxassisliklar boʻyicha amaliy koʻnikmalarni egallagan professional oliy maʼlumotli kadrlarni tayyorlash;
xorijiy yetakchi va nufuzli oliy taʼlim muassasalari ilgʻor tajribasini tatbiq etish asosida malaka talablari, oʻquv rejalari va fan dasturlarini ishlab chiqish, oʻquv va ilmiy-metodik taʼminotni takomillashtirish va amaliyotga joriy etish;

taʼlim jarayoniga raqamli texnologiyalarni joriy etish, zamonaviy axborot-kommunikatsiya va taʼlim texnologiyalari mustahkam integratsiyasini taʼminlash;

tegishli soha yoʻnalishlari boʻyicha kadrlar malakasini oshirish va ularni qayta tayyorlash, ijtimoiy va iqtisodiy muammolarni hal etishga qaratilgan innovatsion tadqiqotlarni faol rivojlantirish;

respublika va xorijiy oliy taʼlim muassasalari hamda ilmiy markazlarga iqtidorli yosh bitiruvchilarni magistratura va doktoranturaga muntazam yuborish orqali universitet ilmiy-pedagogik salohiyatini oshirib borish;

oʻquv jarayoniga ilgʻor xorijiy tajribalarni, zamonaviy taʼlim texnologiyalarini tatbiq etish, ochiq axborot-taʼlim muhitini taʼminlash;

iqtisodiyot tarmoqlari ehtiyojlaridan kelib chiqib, mehnat bozorida raqobatbardosh oliy maʼlumotli mutaxassislar va ilmiy-pedagogik kadrlarni, zamonaviy texnologiyalar boʻyicha chuqur bilimga ega mutaxassislarni tayyorlash, qayta tayyorlash va ular malakasini oshirish boʻyicha uzluksiz taʼlim tizimini yaratish;

yetakchi xorijiy oliy taʼlim muassasalari bilan qoʻshma taʼlim dasturlari va ilmiy loyihalarni joriy etish, universitet professor-oʻqituvchilari malakasini oshirish, bitiruvchilar respublika va xorijiy oliy taʼlim muassasalarida (ilmiy markazlarda) magistratura va doktorantura dasturlari boʻyicha tahsil olishlarini tashkil etish;

oʻquv jarayonini talabalarda mustaqil taʼlim olish, tizimli tahlil qilish, ijodiy fikrlash va amaliy, tadbirkorlik koʻnikmalarini shakllantirishga yoʻnaltirish;

amaliy ilmiy-tadqiqot ishlarini bajarish uchun zamonaviy oʻquv va ilmiy-laboratoriya bazasini shakllantirish, uni ilgʻor texnologik asbob-uskunalar bilan jihozlash hamda oʻquv va ilmiy loyihalarni amalga oshirish;

universitet mintaqa va xalqaro miqyosdagi nufuzini oshirish maqsadida xorijiy fuqarolar uchun taʼlim olish imkoniyatini kengaytirish va ilgʻor xalqaro tajribani tatbiq etish.

Belgilanishicha, universitet davlat oliy taʼlim muassasasi hisoblanadi hamda Oliy taʼlim vazirligi tizimida faoliyat yuritadi. Universitetda oʻquv jarayoni 2023/2024-oʻquv yilidan kredit-modul tizimi asosida tashkil etiladi. Universitet bitiruvchilariga davlat namunasidagi diplom beriladi.

Universitetga talabalarni qabul qilish soni har yili tasdiqlanadigan respublika oliy taʼlim muassasalariga oʻqishga qabul qilish davlat buyurtmasi va qoʻshimcha qabul parametrlaridan kelib chiqqan holda belgilanadi. Universitetda oʻquv jarayoni Vazirlar Mahkamasi huzuridagi Taʼlim sifatini nazorat qilish davlat inspeksiyasi ijobiy xulosasi olinganidan soʻng boshlanadi.

Universitet Toshkent viloyati hokimligi tomonidan ajratiladigan yer maydonida yangi oʻquv binolari va talabalar turar joylarida qurilish ishlari yakunlanib, foydalanishga topshirilgunga qadar universitet Xalq taʼlimi vazirligi Quyi Chirchiq tumanida joylashgan boʻsh turgan binosiga (sobiq Quyi Chirchiq xizmat koʻrsatish va servis kasb-hunar kolleji) tegishli kommunal va foydalanish xarajatlarini qoplagan holda “nol” stavkadagi ijara toʻlovi asosida vaqtincha joylashtiriladi.