O‘zbekiston adliya vaziri Akbar Toshqulov hamda bandlik va mehnat munosabatlari vaziri Nozim Husanov boshchiligidagi mamlakat delegatsiyasi amaliy safar bilan Janubiy Koreyada bo‘lib turibdi, deb xabar qilmoqda «Dunyo».

Safar davomida O‘zbekiston va Janubiy Koreya o‘rtasida o‘zaro hamkorlikni yanada faollashtirish, mehnat migratsiyasi sohasidagi aloqalarni kengaytirish bo‘yicha qator ikki tomonlama muzokaralar tashkil etildi.

O‘zbekiston vakillarining Koreya Respublikasi adliya vaziri Xan Dong Xun va Koreya immigratsiya xizmati komissari Leye Jaye Yu bilan uchrashuvi bo‘lib o‘tdi.

Muloqot chog‘ida ishchilarni Ye-8 vizasi asosida ishga yollash, O‘zbekiston fuqarolarining Janubiy Koreyaga kirib borishi tizimi, mehnat vizalari asosida turli sohalarga ishga jalb qilish bilan bog‘liq masalalar muhokama qilindi.