Shavkat Mirziyoyev va Odri Azule o‘zaro hamkorlik yangi imkoniyatlarini muhokama qildi.

15 noyabr kuni Toshkentda o‘tayotgan Kichik yoshdagi bolalarga tarbiya va ta’lim berish bo‘yicha Butunjahon konferensiyasi doirasida O‘zbekiston prezidenti Shavkat Mirziyoyev BMT Ta’lim, fan va madaniyat masalalari bo‘yicha tashkiloti (YuNeSKO) bosh direktori Odri Azule bilan uchrashuv o‘tkazdi.

O‘zbekiston bilan BMT tizimidagi ushbu nufuzli institut o‘rtasidagi konstruktiv va samarali hamkorlikni kengaytirish jihatlari muhokama qilindi.

Sermahsul sheriklik bugungi darajasi qayd etildi. Mamlakat dasturi va qabul qilingan “yo‘l xaritasi”ga muvofiq qo‘shma dastur va loyihalar amalga oshirilmoqda. Mamlakat ilk bor Nomoddiy madaniy merosni muhofaza qilish xalqaro qo‘mitasi a’zosi etib saylandi. Baxshichilik san’ati va lazgi raqsi nomoddiy madaniy meros ro‘yxatiga kiritildi. O‘zbekistonda tarixiy meros obektlarini himoya qilish masalalari bo‘yicha xalqaro maslahat qo‘mitasi faoliyati va Mintaqaviy gumanitar hamkorlik bo‘yicha “Xiva jarayoni” yo‘lga qo‘yildi. YuNeSKO mamlakat qishloq joylarida professional ta’lim tizimini rivojlantirishga texnik ko‘mak ko‘rsatmoqda. Hamkorlik ustuvor yo‘nalishlarida qo‘shma tadbirlar muntazam o‘tkazib kelinmoqda.

Uchrashuvda Odri Azule O‘zbekistonda yoshlarni qo‘llab-quvvatlash, bolalarga tarbiya va ta’lim berish borasida amalga oshirilayotgan islohotlarni yuksak baholadi hamda ular, xalqaro miqyosda solishtirilganda, eng samarali bo‘layotganini ta’kidladi. Bosh direktor maktabgacha ta’limni rivojlantirish masalalariga bag‘ishlangan Toshkent xalqaro konferensiyasi muvaffaqiyatli o‘tkazilgani bilan tabrikladi.

Yangi mamlakat dasturini amalga oshirishga alohida e’tibor qaratildi. Toshkent shahrida YuNeSKO mintaqaviy markazini ochishga, samarali hamkorlik doirasida qo‘shma tashabbus va ilg‘or loyihalarni ilgari surish bo‘yicha yangilangan “yo‘l xaritasi”ni tayyorlash va qabul qilishga kelishib olindi.