Prezident qarori bilan Toshkent davlat agrar universitetining Termiz filiali negizida Termiz agrotexnologiyalar va innovatsion rivojlanish instituti tashkil etildi.

Institutda quyidagilar boʻyicha zamonaviy bilimlarga ega kadrlar tayyorlanadi:

• tuproq-iqlim sharoitidan kelib chiqib hududlarni ixtisoslashtirish;
• eksportbop va daromadbop qishloq xoʻjaligi ekinlarini yetishtirishni tashkil etish;
• qishloq xoʻjaligida innovatsion resurs tejamkor texnologiyalarni hamda raqamlashtirilgan agrotexnologiyalarni joriy qilish.

Institutda 2021/2022 oʻquv yilidan bakalavriat taʼlim yoʻnalishlarida kredit-modul tizimi bosqichma-bosqich joriy etiladi. Bunda, talabalar uchun haftaning shanba kuni mustaqil oʻzlashtirish kuni deb belgilanadi.

2022-yil yakunigacha Institutda talabalar, magistrlar va ilmiy izlanuvchilar hamda yosh professor-oʻqituvchilarning ilmiy ishlanmalari asosida loyihalarning startaplarini yaratish va amaliyotga tatbiq etish bilan shugʻullanuvchi IT-inkubator ilmiy innovatsion markazi tashkil etiladi.

Institutga tegishli yer maydonlarida anor, xurmo, limon, qora olxoʻri, uzum va boshqa meva-sabzavotlarning yuqori hosilli, yiliga 2-3 marotaba hosil olishga imkon beradigan navlarini yaratish boʻyicha koʻrgazmali dala maydonlari barpo etiladi.

Qarorga koʻra, Institutda bakalavriat taʼlim yoʻnalishlari boʻyicha kechki (smenali) hamda 2022-yildan oliy taʼlimdan keyingi taʼlim (doktorantura)ga qishloq xoʻjaligi ixtisosliklari boʻyicha qabulni tashkil etish nazarda tutilgan.

Toshkent davlat agrar universiteti Termiz filiali talabalari Institutning mos taʼlim yoʻnalishlari va mutaxassisliklariga oʻtkazilib, 2021/2022 oʻquv yilidan boshlab bitiruvchi kurs talabalariga Institut diplomi beriladi.

Institut faoliyati Qishloq xoʻjaligi vazirligi tomonidan muvofiqlashtiriladi.