Joriy yil 23-sentyabr kuni “Iqtisodiyot tarmoqlari, ijtimoiy soha obyektlari va koʻp kvartirali uy-joy fondini 2022/2023-yillar kuz-qish davrida barqaror ishlashga tayyorlashni taʼminlash chora-tadbirlari toʻgʻrisida”gi Hukumat qarori qabul qilindi.

Hujjat bilan quyidagilar nazarda tutilmoqda:

• barcha hududlarda maqbul narxlarda oziq-ovqat yarmarkalarini tashkil etish;
•  
• “Ayollar daftari”, “Yoshlar daftari” va “Temir daftar”ga kiritilgan oilalarga koʻmir va suyultirilgan gazni oʻz vaqtida yetkazib berish hamda bolalarni issiq kiyim-kechak bilan taʼminlash;
•  
• olis va borish qiyin boʻlgan hududlarni hamda tabiiy ofatlar tufayli yoʻllar talofat koʻrishi ehtimoli mavjud qishloq va ovullarga koʻmir va suyultirilgan gazni yetkazib berish hamda 15-20 kunga yetadigan asosiy turdagi oziq-ovqat mahsulotlari zaxirasini yaratish.

Shuningdek, hujjat bilan elektr, gaz, suv taʼminoti, issiqlik energiyasi, koʻmir, suyultirilgan gaz va boshqalar bilan taʼminlashni nazarda tutuvchi iqtisodiyot tarmoqlari, ijtimoiy soha obyektlari va koʻp kvartirali uy-joy fondini kuz-qish mavsumiga tayyorlash boʻyicha kompleks chora-tadbirlar tasdiqlandi. Ularga koʻra, iqtisodiyot tarmoqlari, ijtimoiy soha obyektlari va koʻp kvartirali uy-joy fondini kuz-qish mavsumiga tayyorlashga 1,99 trln soʻm ajratiladi, 737 km issiqlik tarmoqlari, 1,8 ming km suv taʼminoti tarmoqlarini profilaktika va taʼmirlash hamda 1,68 mln tonna koʻmir zaxirasini yaratish rejalashtirilmoqda.

Shu bilan birga masʼul idoralarga mavsumga tayyorgarlik jarayoni toʻgʻrisida xalq deputatlari mahalliy Kengashlari oldida hisobot berib borish vazifasi yuklatilgan.