Олий ва ўрта махсус таълим вазири Абдуқодир Тошқулов АОКАда ўтказилган матбуот анжуманида маълум қилишича, Ўзбекистондаги ОТМларда ўқувчи 211 минг нафар талабанинг турар-жойга эҳтиёжи бор.

Вазирнинг таъкидлашича, 1991-2010 йилларда ётоқхона ўринлари сони камайса камайганки, кўпаймаган.

«1991-2010 йилларда ётоқхона ўринлари сони камайса камайганки, кўпаймаган. 2010-2016 йилларда 2000 ўринли талабалар турар-жойи барпо этилган. Ҳозирги кунда битта талаба учун турар-жой қиймати 40-50 миллион сўм атрофида, яъни, масалан, 400 ўринли талабалар турар-жойи тахминан 20 миллиард сўм атрофида бўлади», – дейди Тошқулов.

Унинг сўзларига кўра, 2017-2022 йил якуни билан 56 минг ўринли талабалар турар-жойи мавжуд. Бу 2010-2016 йилга нисбатан 28 баробар кўп. Ўзбекистонда 2016 йилда 77 та ОТМ бўлган бўлса, айни кунда уларнинг сони 172 тага етган. Унда таҳсил олувчи талабалар эса 200 минг нафардан 800 минг нафарга чиққан.

«Талабалар турар-жойининг етишмаслик муаммоси олий таълим муассасалари, талабалар сонини кўпайтиргунга қадар ҳам кўп эди. Дунё олий таълим тизимини ўрганганимда бир нарсага гувоҳ бўлдим — талабаларни ётоқхона билан 100 фоиз таъминлаган бирорта давлат йўқ. Айни пайтда Ўзбекистондаги ОТМлар ётоқхонасида 91 минг талабага жой бор. ОТМларда ўқувчи 211 минг нафар талабанинг эса турар-жойга эҳтиёжи бор», – дея таъкидлайди вазир.