Хабарингиз бор, Республика Маънавият ва маърифат маркази, Маърифат тарғиботчилари жамияти ва манфаатдор ташкилотлар томонидан «Маҳаллада дув-дув гап» лойиҳаси амалга оширилиб келмоқда.



Жорий йилнинг 24 август куни Тошкент шаҳри Янгиҳаёт туманининг «Ташаббус» МФЙ «Янги Ўзбекистон – инсон қадри улуғланган юрт» шиори остида «Маҳаллада дув-дув гап» маънавий-маърифий тадбири ўтказилди. Тадбирда 20 дан ортиқ лойиҳа доирасидаги қатор тадбир ва ижтимоий акциялар ташкил этилди.



Хусусан, «Инсон қадри» меҳр-мурувват акцияси орқали маҳалладаги 10 нафар ёлғиз кексалар ва ногирон ёшларнинг ҳолидан хабар олинди. «Маҳалладаги маърифатли аёл», «Маҳалладаги одобли қиз», «Маҳалла келини» номинациялар ғолиблари аниқланиб ғолиблар тақдирланди. «Сиз туғилган кун» лойиҳаси доирасида уч нафар кекса авлод вакили совғалар билан йўқланди. «Бир нуроний ўн ёшга масъул» лойиҳасида фаол иштирок этган маҳалла фаоли ҳам эътироф этилиб қимматбаҳо совғалар топширилди.



Шунингдек тадбир давомида «Янги Ўзбекистон ёшлар нигоҳида» мавзусида маҳаллаларда истиқомат қилаётган ёш рассомлар кўргазмаси, қувноқлар ва зукколар, билимдонлик, стол тенниси, футбол, шахмат, шашка, қўл кураши (армрестлинг) каби спорт мусобақалари ташкил этилиб ғолиблар муносиб тақдирланди. Ўзбекистон Республикаси Ҳунармандлар уюшмаси билан ҳамкорликда кўргазмалар ва мастер класс «Устоз - шогирд» акциялари ўтказилди.



Мазкур тадбир доирасида 2 минг нафардан зиёд аҳоли қамраб олинди. Тадбирда фан, маданият, санъат намоёндалари, фахрий нуронийлар, ёшлар етакчилари, хотин-қизлар фаоллари ҳамда маҳалла ёшлари фаол иштирок этди.