Ижтимоий тармоқларда туркиялик сайёҳ Бухоронинг эски шаҳар қисмида ҳожатхона излаб юргани ва ресторан ҳожатхонасидан фойдаланиш учун сув сотиб олишга мажбур бўлгани ҳақидаги видео тарқалди.

Унда аёл яқин атрофда ҳожатхона топа олмагани, ошхонадан илтимос қилганида рад этишгани ва у ердан 0,5 литр сувни 1 доллар (10 000 сўм)га сотиб олганини айтади. «Мени ўзбекларга ўхшайсан дейишади. Мен бундай ўзбекларга ўхшашни истамайман» деган у.

Ушбу ҳолат юзасидан Бухоро вилоят туризм ва маданий мерос бошқармаси матбуот хизмати муносабат билдирди.

Қайд этилишича, сайёҳ юрган Ҳақиқат кўчасида 2 та ҳожатхона бор ва йўл кўрсаткичлари ўрнатилган.

Шунингдек, шу ерда Bukhara Silk Carpet маркази орқасида аёллар ва эркакларнинг замонавий ҳожатхоналари мавжуд. 

«Сайёҳ ҳаракатланган кўчанинг ҳам ўнг, ҳам чап тарафида замонавий ҳожатхоналар мавжуд.  Кўчада жойлашган қатор ҳунармандчилик марказларининг ҳунармандлари ёрдам жоиз бўлса, келган сайёҳга кўмак бериши шубҳасиздир. Чунки барчага маълумки, Бухоро аҳли доимо меҳмондўст, очиқ юзли ва беминнат ёрдам қўлини чўзадиган халқдир», дейилади муносабатда.