Самарқандда очилган ушбу музейда Туркистонда жадидчилик ҳаракати етакчиси Маҳмудхўжа Беҳбудий ижоди ва ҳаёти тўғрисидаги маълумотлар, ўша давр маданияти, илм-фан ва таълим ривожига ҳисса қўшган бир қанча маърифатпарвар олимларнинг фотосуратлари, илмий асарлари мавжуд.

Экспозициядан, шунингдек, ХХ аср бошларига тегишли ноширлик дастгоҳи, газета ва журналлар нусхалари, илмий архив ҳужжатлари ва нодир ашёлар ўрин олган.

– Бу бинода "Самарқанд" газетаси, "Ойина" журнали чоп этилган, – дейди СамДЧТИ ўқитувчиси Дилафрўз Раҳматова. – "Падаркуш" драмаси ҳам илк бор шу бино ҳовлисида саҳналаштирилган.