Жорий йилнинг 8 июль куни Қашқадарё вилоят перинатал марказида 3 эгизак дунёга келди. Бу ҳақида Қашқадарё вилояти адлия бошқармаси хабар қилди.

Косон туманининг «Гувалак» маҳалласида яшовчи 26 ёшли Элсариева Ўғилой бирваракайига 3 эгизак фарзандларни дунёга келтирди. Эгизакларнинг туғилиши 8 июль куни соат 7:30 да Косон туман ФҲДЙ бўлими томонидан қайд қилиниб, туғилганлик гувоҳномалари топширилди.

Таъкидланишича, туғруқ табиий йўл асосида, асоратсиз ўтказилган. Эгизакларнинг каттаси 1.200 килограмм, иккинчиси 2,260 килограмм ва учинчиси 1.130 килограмм вазн билан туғилган бўлиб, уларга Шавкат, Миромон ва Мирзиё исмлари қўйилган.

Оила вакиллари айни пайтда гўдакларнинг аҳволи яхшилигини, она ва болалар ҳали ҳам вилоят перинатал марказида шифокорлар назорати остида эканлигини маълум қилишди.

Маълумот ўрнида, 2022 йилнинг 6 ойи давомида Косон туманида 3421 та чақалоқ дунёга келган. Шундан 1746 таси ўғил бола, 1675 та қиз болага тўғри келади.