Автомактаблар рейтингини тузишда уларнинг битирувчилари назарий ва амалий имтиҳонларда қандай натижа кўрсатгани, ҳайдовчилик гувоҳномаси олгандан кейин йил якунигача йўл ҳаракати қоидаларига амал қилмасдан қанча жарима баллини йиғгани, битирувчиларнинг айби билан нечта ЙТҲ содир этилгани ҳисобга олинади.

Ҳукумат қарори билан, автомототранспорт воситалари ҳайдовчиларини тайёрлаш, қайта тайёрлаш ва уларнинг малакасини оширишни амалга оширувчи таълим ташкилотларининг рейтингини аниқлаш тартиби тўғрисида низом тасдиқланди.

Низомга кўра, рейтинг баҳолаш қуйидаги кўрсаткич (индикатор)ларга асосланган ҳолда тузилади:

• таълим ташкилотлари битирувчиларининг ҳайдовчилик гувоҳномасини олиш учун назарий ва амалий имтиҳон натижалари;
• таълим ташкилотлари битирувчиларининг ҳайдовчилик гувоҳномасига эга бўлгандан кейин, йил якунигача йўл ҳаракати қоидаларига амал қилмаслик ҳолларидаги жарима баллари;
• йил якунигача қонуний кучга кирган суд қарорига асосан таълим ташкилотлари битирувчилари айби билан содир этилган йўл-транспорт ҳодисалари сони;
• таълим ташкилотларида тўлиқ штатда фаолият юритадиган олий маълумотга ёки илмий даражага эга ўқитувчиларнинг сони тўғрисида маълумотлар.

Таълим ташкилотлари рейтингини баҳолаш кўрсаткич (индикатор)лар асосида Йўл ҳаракати хавфсизлиги хизмати томонидан амалга оширилади.

Қарорга кўра, таълим ташкилотлари рейтинги қуйидагича тоифаларга ажратилади:

• 81 баллдан 100 баллгача – “яшил”;
• 51 баллдан 80 баллгача – “сариқ”;
• 50 баллдан паст – “қизил”.

Рейтинг балл кўрсаткичлари республика бўйича ягона шаклда юритилади ҳамда йил якунлари бўйича Қорақалпоғистон Республикаси, вилоятлар ва Тошкент шаҳри бўйича алоҳида ҳисоблаб чиқилади.

Қайд этилишича, рейтинг натижалари ҳар йили 25 январда ОАВ ва ижтимоий тармоқларда эълон қилинади. Низом 2022 йил 1 сентябрдан эътиборан кучга киради.