Аввалроқ, ижтимоий тармоқларда Сурхондарё вилоятидаги тўйлардан бирида келин-куёв ўртасида ўйин ўтказилгани ва ютқазган куёв келиннинг бошига ургани акс этган видео тарқалгани ҳақида хабар берган эдик. Бош прокуратуранинг маълум қилишича, куёвнинг кимлиги маълум бўлган, унга нисбатан иш очилган. 

Қайд этилишича, 2022 йил 6 июнь куни Сурхондарё вилояти Узун туманида бўлиб ўтган никоҳ тўйи маросимида келин ва куёвга ўралган ҳолда ширинлик берилиб, уни ким биринчи бўлиб очиш («Сюрприз» ўйини) ўйини ўтказилган.

Ўйин давомида келин биринчи бўлиб ширинликни очганлиги сабабли бу ҳолатдан куёвни жаҳли чиқиб келинни бир маротаба урган.

Мазкур ҳолат юзасидан Узун тумани ИИБ томонидан фуқаро Х.Р. (куёв) га нисбатан Маъмурий жавобгарлик тўғрисидаги Кодексининг 183-моддаси (майда безорилик) билан маъмурий иш қўзғатилиб, тўпланган ҳужжатлар кўриб чиқишлик учун судга юборилди.

Оила ва хотин-қизлар давлат қўмитасининг маълум қилишича, шундан сўнг тўй давом этиб, ҳеч қандай кўнгилсиз ҳолат содир бўлмаган ва ҳеч қаерга мурожаат тушмаган.

Ушбу ҳолат мазкур маҳаллада яшовчи маҳалладошлари томонидан видеотасвирга олинган (аниқлашнинг имкони бўлмаган) шахс томонидан интернетга жойлаштирилган.