Ўзбекистон Республикаси Вазирлар Маҳкамасининг 22 майдаги 304-сон қарорига мувофиқ тасарруфида олий таълим муассаса ёки илмий ташкилотлари бўлган жами 39 та вазирликлар, идоралар ва ташкилотлардан 2022 йил учун стажёр-тадқиқотчиликка, таянч докторантура, докторантура ва мақсадли докторантурага қабул квотаси бўйича буюртмалар қабул қилинди.

2022 йил учун олий таълимдан кейинги таълим институтларига қабул квоталари 2 бараварга оширилиб, 3600 тага етказилди. 2021 йилда олий таълимдан кейинги таълим институтларига қабул квоталари 1800 та бўлган.

Ўзбекистон Республикаси Президентининг 2021 йил 17 февралдаги ПҚ-4996-сонли қарори ижроси юзасидан Сунъий интеллект соҳасида таянч докторантура ва стажёр-тадқиқотчиликка жами 28 та мақсадли квоталар ажратилди.

Жумладан, таянч докторантурага 14 та, стажёр-тадқиқотчиликка 14 та, шундан, Рақамли технологиялар ва сунъий интеллект ихтисослиги бўйича 4 та таянч докторантурага, 6 та стажёр-тадқиқотчиликка мақсадли квоталар ажратилди.

Ўзбекистон Республикаси Президенти Ш.М.Мирзиёевнинг 2021 йил 1-2 июнь кунлари Сурхондарё вилоятига ташрифи давомида берилган топшириқлар ва кенгайтирилган тарзда ўтказилган 30-сонли йиғилиш баёни 107-бандидаги Сурхондарё вилоятида жойлашган олий таълим муассасаларининг илмий салоҳиятини ошириш учун республиканинг етакчи олий таълим ва илмий-тадқиқот институтларида 2022 йилда мақсадли докторантурага 50 та квоталар ажратиш топшириғи ижроси юзасидан жами 67 та мақсадли докторантурага қабул квота ажратилди.

Шундан:
-Олий ва ўрта махсус таълим вазирлигига – 45 та;
-Соғлиқни сақлаш вазирлигига – 10 та;
-Қурилиш вазирлиги ва “Ўзкимёсаноат” АЖ – 4 тадан;
-Транспорт вазирлигига – 2 та;
-Қишлоқ хўжалиги вазирлигига ва Фанлар академияси тизимидаги илмий ва таълим ташкилотларга – 1 тадан мақсадли докторантурага қабул квотаси ажратилди.

Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Маҳалла ва оилани қўллаб-қувватлаш вазирлиги ҳузуридаги Маҳалла ва оила илмий-тадқиқот институти ҳамда Ўзбекистон Республикаси Инновацион ривожланиш вазирлиги ҳузуридаги Илғор технологиялар марказига биринчи марта докторантурага қабул квоталари ажратилди.