Аввалроқ, маймун чечаги касаллигига қарши кўрилаётган эпидемиологик чора-тадбирларга бағишланган матбуот анжумани ўтказилаётгани ҳақида хабар берган эдик.



Унда Санитария эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков маймун чечаги ҳақида маълумот берди.
 

«Ташвишга ўрин йўқ дейишимизнинг асосий сабабларидан бири коронавирус бошланган вақтида бирор-бир вакцина мавжуд эмас эди. Шунингдек, аниқроқ даволаш протоколлари ҳам йўқ эди. Ҳозирги кунда аҳолимизнинг тенг ярмида чин чечакка қарши қабул қилинган эмланиш натижасида иммунитет бор. Яъни салкам 50 фоиз аҳолимизда жамоавий иммунитет бор. Шунингдек, бу касалликни даволаш бўйича протоколлар ҳам мавжуд. Яна бир фарқли жиҳати коронавирус ўзининг мутациялари, ўзгарувчанлиги билан одамларни жуда чалғитди. 

 

Дунё мамлакатларида коронавируснинг 10 минглаб мутациялари аниқланганини қайд этилди. Коронавирус қўзғатувчисидан фарқли равишда бу вирус ДНК ташувчи вирус ҳисобланиб, мутация бўлиш эҳтимоли жуда паст. Бўлган тақдирда ҳам бир неча юзлаб йил ўтгандан сўнг мутация содир бўлиши мумкин.

 

Маймун чечаги аксарият, яъни 98 фоиз ҳолатда енгил кечади. Марказий Африcа штамми 90 фоизгача енгил ўтади. Бу касалликка чалинганларни 100 фоиз стационар шароитда даволашга эҳтиёж йўқ. Лекин касаллик авж олса, оғир кўринишларга олиб келса бунинг учун алоҳида шифо ўринлари захираси ташкил этилади. Касаллик кириб келса ва унга шубҳа қилинса уларни даволаш учун амбулатория ва стационар шароитда даволаш учун алоҳида тиббий протоколлар мавжуд», деди Нурмат Отабеков.