Наманган вилояти Косонсой туманидаги 47-сонли умумтаълим мактабининг ижодий-маданий масалалар бўйича тарғиботчиси Умматали Дадабоев айни пайтда онлайн таълим олаётган ўқувчиларни китобга қизиқтириш учун хайрли ташаббус бошлади.

У ўзининг “Матиз” русумли авто уловида кўчма кутубхона ташкил этиб, маҳалла бўйлаб болажонларга китоблар улашмоқда. Ўқувчилар томонидан ўқиб бўлинган китоблар тарғиботчи иштирокида муҳокама қилингач, бошқасига алмаштириб берилади.

– Мақсадимиз шуки, китоблар ҳар бир ўқувчига етиб борсин, уларнинг қалбига зиё кирсин, вақтлари унумли ўтсин, шундагина кўзланган марраларга эришамиз, – дейди Умматали Дадабоев.