Тошкент вилоятининг Юқоричирчиқ туманида чуқурга тушиб кетган бола қутқариб қолинди. Бу ҳақда Фавқулодда вазиятлар вазирлиги хабар қилди.

Таъкидланишича, кеча соат 13:47 да Тошкент вилояти Фавқулодда вазиятлар бош бошқармаси навбатчилик қисмига «Саксонота» маҳалласидаги хонадонлардан бирида қаровсиз қолган 5 ёшли бола чуқурга ўрнатилган қувур ичига тушиб кетгани ҳақида хабар келиб тушган. Тошкент вилояти Фавқулодда вазиятлар бош бошқармаси қутқарувчилари зудлик билан воқеа жойига етиб бориб, махсус асбоб-ускуналар ёрдамида қисқа вақт ичида болани қувур ичидан соғ-саломат олиб чиққан. Шифокорларнинг маълум қилишича, боланинг аҳволи яхши.

«Кичик ёшдаги фарзандларингизни қаровсиз қолдирманг», дея огоҳлантирган вазирлик.