Эндиликда Ягона интерактив давлат хизматлар портали фойдаланувчилари хабарнома орқали суд мажлиси тўғрисида хабардор бўлиш ҳамда фуқаролик, маъмурий, иқтисодий ва маъмурий ҳуқуқбузарлик тўғрисидаги ишлар бўйича дастлабки суд маълумотлари билан танишиш имконияти яратилди. Бу ҳақда Олий суд маълум қилди.

Президентининг 2025 йил 21 августдаги “Судлар фаолиятига сунъий интеллект технологияларини жорий этиш орқали одил судловга эришиш даражасини ошириш ҳамда суд тизимининг моддий-техник таъминотини яхшилашга доир қўшимча чора-тадбирлар тўғрисида”ги Фармонида белгиланган вазифага кўра, фуқароларга суд ишлари бўйича тезкор маълумот етказиш мақсадида Олий суднинг ахборот тизимлари Ягона интерактив давлат хизматлар портали билан интеграция қилинди. 

Натижада жисмоний ва юридик шахсларга ўзларига тегишли фуқаролик, маъмурий, иқтисодий ва маъмурий ҳуқуқбузарлик тўғрисидаги ишлар юзасидан суд мажлиси ўтказиладиган сана, вақт ва суд тўғрисида олдиндан хабардор бўлади.

Ушбу хизмат жорий этилиши натижасида фуқаролар ва тадбиркорлик субъектларининг судга келиб-кетиш билан боғлиқ ортиқча харажатлари ва вақт сарфи қисқартирилади, шунингдек суд мажлиси иштрокчиларининг суд мажлиси тайинланганлиги ҳақида бехабар қолиш ҳолатларига барҳам берилади.

Аввалроқ Ўзбекистонда “судга чақирув” номли APK файл юбориш билан фирибгарлик қилиш ҳолатлари кузатилганди.