Туркиянинг Ҳатай вилоятида Ўзбекистон кўмагида қурилган янги масжид фойдаланишга топширилди.

Хабарга кўра, Туркиянинг мураккаб даврлардан бирида ўзбек халқи кўрсатган беғараз ёрдами ва бирдамлиги учун миннатдорчилик рамзи сифатида масжидга «Бухоро» номи берилган.

Ибодат маскани 3200 га яқин хонадонни ўз ичига олган йирик турар-жой массивининг марказида жойлашган бўлиб, бир вақтнинг ўзида 500 кишини ўз ичига сиғдира олади.

Бино замонавий архитектура, қулай шароитлар ва эстетик дизайни билан ажралиб туради.

Таъкидланишича, мазкур лойиҳа икки давлат ўртасидаги дўстона муносабатлар ва гуманитар ҳамкорликнинг янада мустаҳкамланишига хизмат қилади.