Ижтимоий тармоқларда Россия Давлат думаси депутати ва собиқ боксчи Николай Валуевнинг Марказий Осиёда “махсус операция” ўтказиш кераклиги ҳақидаги видеоси тарқалган эди. У видео сунъий интеллект ёрдамида яратилган фейк экани ҳақда “РИА Новости”га маълум қилди.

Валуевнинг “Биз 30 йил давомида постсовет республикаларига “ширинликлар” улашдик, лекин бу ёрдам бермади. Энди қамчи керак бўлади” деб айтгани акс этган кадрлари тарқалган эди.

“Видеонинг менга ҳеч қандай алоқаси йўқ. Технологиялар шиддат билан ривожланаётгани қувонарли, аммо бу сунъий интеллект ёрдамида амалга оширилган. Мен кўпинча сунъий интеллект ва шунга ўхшаш сохта видеолар яратиш мавзусини кўтараман. Эҳтимол, сунъий интеллект мендан хафа бўлган”, дея Валуев ижтимоий тармоқларда тарқалган кадрларга изоҳ берди.

​Валуевнинг “видеоси”га аввалроқ ўзбекистонлик боксчи Руслан Чагаев жавоб қайтариб, Валуев билан жангга кириш таклифини берган эди.

“Менимча бу сунъий интеллект томонидан тайёрланган. Агар ундай бўлмаса, Валуевни калласини жойига қўйиш керак бўлса, мен тайёрман. Жангдан сўнг у Марказий Осиё ҳақида бундай “бемаза” гаплар гапирмайди”, деган эди у.