Ўзбекистонда олтин қуймалари нархи яна рекорд ўрнатди. Марказий банк маълумотларига кўра, бир грамм олтиннинг нархи 2 058 400 сўмни ташкил этди. Ички бозорда кетма-кет еттинчи кун рекорд янгиланмоқда.

28-январь куни олтин қуймалар нархи қуйидагича белгиланди:

• 5 грамм — 10 млн 291 минг сўм;

• 10 грамм — 20 млн 582 минг сўм;

• 20 грамм — 41 млн 165 минг сўм;

• 50 грамм — 102 млн 912 минг сўм;

• 100 грамм — 205 млн 825 минг сўм.

Маълумотларга кўра, йил бошидан буён олтин нархи 18 фоизга ошган. Ўтган йилнинг айни шу санаси билан таққослаганда эса ўсиш суръати 74,5 фоизга етган.

Қуймаларни қайтариб сотиб олиш нархи ҳам ўзгарган. Агар қуйманинг қадоғи бутун бўлса, унинг қайта харид нархи сотиш қийматидан 5 фоизга паст белгиланмоқда. Бу кўрсаткич 27-январь куни 4 фоизни ташкил этган эди, яъни фарқ бир кун ичида 1 фоизга ошган.

Жаҳон бозорида ҳам олтин нархи тарихий рекордларни қайд этмоқда. 27-январь куни 1 унсия олтин нархи илк бор 5 минг доллардан ошганди. 28-январь куни соат 10:00 ҳолатига кўра эса бу кўрсаткич 5 минг 245 долларга етди.