Ўзбекистон тарихига биринчи бўлиб кирганлар кўп. Уларнинг айримлари кейинги авлод учун руҳлантирувчи шахс бўлган бўлса, бошқалари "нарвон" вазифасини бажарган. Қуйида уларнинг айримлари билан танишасиз.

Оқилхон Шарафиддинов – ўзбек тилидаги биринчи алифбе дарслиги муаллифи. 1938 йилда ёзилган мазкур китоб кейинчалик такомиллаштирилиб, қайта нашр этилди. Ҳозирги кунда Тошкентдаги 129-мактаб Оқилхон Шарафиддиновнинг номи билан аталади.

Георгий Агзамов – ўзбекистонлик илк халқаро гроссмейстер.

Агзамов 1984 йилда (30 ёшида) ўзбек шахматчилари орасида биринчи бўлиб халқаро гроссмейстер унвонини қўлга киритган.

Турсуной Саидазимова – биринчи ўзбек актрисаси. У фақат санъат саҳнасидагина эмас, аёлларнинг маънавий озодлиги йўлида ҳам курашган фидойи шахс ҳисобланади.

Солижон Шарипов – илк ўзбек космонавт. Шарипов 1998 йилда коинотга парвоз қилган. У икки маротаба космосга учган ва “Буюк хизматлари учун” ордени билан тақдирланган.

Руфат Рисқиев – жаҳон чемпиони бўлган биринчи ўзбек боксчиси. У 1974 йилда Кубада ўтган мусобақада ғолиб бўлган. Кейин Олимпиадада кумуш медални қўлга киритган.

Башорат Мирбобоева – илк аёл паровоз машинисти. Шунингдек, Мирбобоева биринчи парашютчилардан. У 1937 йилдан бошлаб Ўзбекистондаги биринчи аёл паровоз машинисти бўлган.

Дилбар Абдураҳмонова – ўзбек ва совет дирижёри, скрипкачиси. 1977 йилда СССР Халқ артисти унвонига сазовор бўлган ва тарихда биринчи аёл дирижёр сифатида танилган.

Собира Холдорова – қатағонда қурбон бўлган илк аёл журналист.

Хабарга кўра, бугунги кунда “Ўзбекистоннинг биринчи қалдирғочлари” номли ҳужжатли фильм намойиши режалаштирилган. Фильмда элга ибрат бўлган бу шахслар ҳақида қисқа, таъсирчан лавҳалар ўрин олади.