Президентнинг Бўстонлиқ туманига қилган ташрифи доирасида ўқитувчи ва мураббийлар билан мулоқот қилиши ҳам режалаштирилган эди.

Мазкур йиғилишда давлат раҳбари таълим тизимида кутилаётган бир қатор янгиликларни маълум қилди.

Жумладан, энди давлат ва хусусий боғча тарбиячиларини ишдан ажралмаган ҳолда олийгоҳларда ўқитиш йўлга қўйилиб, йилига 10 минг тарбиячи олий маълумотли қилинади. Бу олий маълумотли билан ўрта маълумотли тарбиячининг ойлигида бўлаётган тафовутга барҳам беради.

Шунингдек, хусусий боғчалардаги тарбиячилар ойлиги ва бола харажатининг бир қисми ҳам бюджетдан қоплаб бериладиган тизим жорий этилади.

Бундан ташқари, худди Президент мактаблари каби ҳар бир вилоятда «Янги авлод» боғчалари ташкил қилиниб, уларда тарбиячилар илғор педагогик технологияларни ўрганади.

Энг муҳими, янги методикаларни ўрганиш учун бу масканларнинг эшиги хусусий боғча тарбиячиларига ҳам доимо очиқ бўлади.