Андижон вилояти, Бўстон тумани ҳокимининг инвестиция ҳамда қишлоқ ва сув хўжалиги масалалари бўйича ўринбосарлари пора олишда гумонланиб ушланди. Бу ҳақда Давлат хавфсизлик хизмати хабар берди.

Унга кўра, бу икки амалдор хизмат мавқеидан фойдаланган ҳолда, тумандаги фермер хўжаликнинг 500 минг долларлик экспорт режасини сохта экспорт операциялари орқали ёпиб бериш эвазига 65 млн сўм пора талаб қилган.

Туман ҳокимининг қишлоқ ва сув хўжалиги масалалари бўйича ўринбосари 2025 йилнинг август ойида сўралган пулнинг 25 млн сўмини аванс сифатида олган. Қолган қисмини, яъни 40 млн сўмни эса туман ҳокимининг инвестиция масалалари бўйича ўринбосари орқали олаётган пайтда ашёвий далиллар билан ушланган.

Ҳозирда ҳолат юзасидан мазкур мансабдор шахсларга нисбатан Жиноят кодексининг 210-моддаси 2-қисми «в», «г» бандлари (Тамагирлик йўли билан, бир гуруҳ мансабдор шахслар томонидан олдиндан тил бириктириб пора олиш) билан жиноят иши қўзғатилиб, қамоқ эҳтиёт чораси қўлланган.