Жорий йилнинг 24-октябр куни Ўзбекистон ва Европа Иттифоқи томонидан кенгайтирилган ҳамкорлик тўғрисидаги шартнома имзоланиши режалаштирилмоқда. Бу ҳақда Европа Кенгаши раиси Антониу Кошта Ўзбекистон президентига йўллаган табрик муактубида маълум қилинган.

“Сиз билан 2025-йил 24-октябр куни Брюсселда учрашишни интизорлик билан кутмоқдаман. У ерда Европа Иттифоқи ва Ўзбекистон ўртасидаги Кенгайтирилган шериклик ва ҳамкорлик тўғрисидаги битимни имзолаш муносабати билан фикр алмашишни давом эттириш имкониятига эга бўламиз”, дейилади табрик мактубида.

Янги келишув 1999-йилдан буён амалда бўлган эски шартнома ўрнини эгаллаши кутилмоқда. Ушбу масала юзасидан музокаралар 2019-йилда бошланиб, 2022-йилда якунланган. Битим кенг қамровли масалаларни, жумладан, савдо тўғрисидаги қоидалар, техник тартибга солиш, санитария чоралари ва бошқа соҳаларни ўз ичига олади.