Қирғизистон президенти Садир Жапаров “Тиббиёт соҳасида мутахассислар тайёрлашда давлат монополиясини жорий этиш тўғрисида“ги фармонни имзолади, деб хабар беради Президент матбуот хизмати.

Ҳужжат тиббиёт ва фармацевтика соҳаси кадрларини тайёрлаш тизимини тубдан такомиллаштириш, уларни қайта тайёрлаш ва малакасини оширишга, шунингдек, соғлиқни сақлаш тизимидаги устувор муаммолар бўйича кенг қамровли илмий тадқиқотлар олиб бориш, таълим ташкилотлари ресурсларидан самарали фойдаланиш ва уларнинг моддий-техник базасини мустаҳкамлашга қаратилган.

Қайд этилишича, сўнги йилларда таълим фаолиятини амалга ошириш лицензиясига эга хусусий тиббиёт муассасалари жадал суратларда ортиб бормоқда. Бироқ уларнинг барчасида ҳам зарур клиник база мавжуд эмас. Педагоглар таркиби бўлса малака талабларига жавоб бермайди. Ўқитиш минимал амалий тайёргарлик ва расмий диплом бериш билан чекланади.

Бунинг оқибатида ҳар йили етарли билим ва амалий кўникмаларга эга бўлмаган юзлаб мутахассислар етишиб чиқади, мамлакат тиббий таълим тизимига бўлган ишонч сусайиб, қирғиз дипломининг халқаро макондаги обрўсига путур етади.

Бу ҳолат тиббиёт мутахассисларини тайёрлашда тизимли инқирозларга олиб келади, мамлакат соғлиқни сақлаш тизимида кадрлар етишмовчилиги кучаяди. Бу эса миллий хавфсизликка хавф солиб, ноқонуний миграция ва чет эллик талабаларнинг ноқонуний ишлаш ҳолатларини ортишига сабаб бўлади.

Президент фармони билан:

• - И. К. Ахунбаев номидаги Қирғизистон давлат тиббиёт академиясига олий тиббий ва фармацевтика маълумотига эга бўлган мутахассисларни тайёрлаш, тиббиёт ва илмий кадрларни қайта тайёрлаш ва уларнинг малакасини ошириш бўйича мутлақ ҳуқуққа эга бўлган тизимни шакллантирувчи давлат олий таълим муассасаси мақомини бериб, медицина соҳасида мутахассислар тайёрлаш бўйича давлат монополиясини жорий этиш;
• - тиббиёт олий таълим ташкилотларининг давлат аккредитациясини тасдиқлаш;
• - тиббиёт мутахассисликлари бўйича ягона давлат таълим стандартини жорий этиш;
• - давлат тиббиёт муассасаларида таълим тараққиётининг клиник амалиёт билан узвий боғлиқлигини таъминлаш;
• - тиббий таълим тизимида коррупциявий хавфларни минималлаштириш ва шаффофликни ошириш;
• - хусусий тиббиёт олий таълим муассасаларининг лицензия, аккредитация ва малака талабларига мувофиқлигини, шу жумладан, кадрлар таркиби ва уларнинг малака стандартларига мувофиқлигини, клиник базаларнинг мавжудлиги ва ҳолатини, ўқув ва моддий-техника инфратузилмасини ўрганиш учун давлат органлари вакиллари иштирокида идоралараро комиссия тузиш назарда тутилган.