Иқтисодиёт ва молия вазирлиги фуқароларни “Опен бюджет”га овоз бериш билан боғлиқ фирибгарликдан огоҳлантирди.

Қайд қилинишича, сўнгги вақтларда ижтимоий тармоқларда норасмий Телеграм ботлари орқали “Ташаббусли бюджет” жараёнларида овоз бериш эвазига пул мукофотлари таклиф этиш ҳолатлари кенг тарқалиб, турли баҳс ва мунозараларга сабаб бўлмоқда. Хусусан, ваъда қилинган маблағлар берилмаётгани бўйича вазирликка юзлаб мурожаатлар келиб тушмоқда.

Ушбу ҳолатда учинчи шахслар лойиҳаларга овоз тўплаш мақсадида пул маблағлари ёки моддий қийматлиликлар ваъда қилган ҳолда фуқаролардан овоз тўплаб, кейинчалик мукофотларни бермаслиги ҳолатлари кузатилмоқда.

Вазирлик “Ташаббусли буджет” жараёнларида овоз бериш фақатгина “Очиқ бюджет” ахборот портали, порталнинг Андроид ва иОС тизимларида ишловчи мобил иловалари ҳамда Телеграмдаги расмий бот  орқали амалга оширилишини, бунда, амалдаги тартибга кўра, берилган овозлар учун ҳеч қандай тўлов талаб этилмаслиги билан бир қаторда ҳеч қандай моддий рағбатлантиришлар ҳам назарда тутилмаганини маълум қилди.

“Мукофотлар учун эмас, ўзгаришлар учун овоз беринг. Шахсий маълумотларингизни ҳеч кимга тақдим этманг. Фирибгарлар тузоғига тушиб қолманг”, дея огоҳлантирди Иқтисодиёт ва молия вазирлиги.

“Ташаббусли бюджет” жараёнининг 2025-йилги 2-мавсуми доирасида овоз бериш босқичи 22-августдан бошланган. У 31-август куни соат 23:59 га қадар давом этади.