Ўзбекистонда 2025-йил 1-ноябрдан ишсизлик нафақасини тўлаш тартиби ўзгармоқда.

Қайд этилишича, ишсизлик нафақаси фақат меҳнат шартномаси бекор қилинган шахсларга тўланади. Энди ишсизлик нафақаси сўнгги 5 йилда камида 18 ой ишлаган шахсларга берилади. Бунинг учун улар меҳнат шартномаси бекор қилингандан сўнг 6 ой ичида мурожаат қилиши лозим.

Нафақа охирги 18 ойлик ўртача иш ҳақи ҳисобидан 3 ой давомида тўланади. 1-ойда ўртача ойлик иш ҳақининг 75 фоизи, лекин меҳнатга ҳақ тўлашнинг энг кам миқдорининг 3 бараваридан ошмаган миқдорда, 2- ва 3-ойларда эса ўртача ойлик иш ҳақининг 50 фоизи, лекин меҳнатга ҳақ тўлашнинг энг кам миқдорининг 3 бараваридан ошмаган миқдорда тўланади.

Ишсизлик нафақасини такроран белгилашда дастлабки тайинланган нафақани олиш муддати тугагандан сўнг, қўшимча равишда камида 12 ойлик иш стажи талаб этилади.