Кеча, 22 август куни Ўзбекистон Республикаси Президенти Шавкат Мирзиёев Туркманистонда бўлганидан хабарингиз бор.

Мазкур амалий ташрифнинг маданий дастури доирасида Туркман халқининг миллий етакчиси, Халқ Маслаҳати Раиси Гурбангули Бердимуҳамедов ва Озарбайжон Республикаси Президенти Илҳом Алиев биргаликда «Аваза» конгресс маркази ёнидаги махсус майдонга ташриф буюрди.

Олий мартабали меҳмонларга «Галкиниш» миллий от спортижамоаси ахалтака зотли тулпорларининг чиқишлари намойиш этилган.

Маълумот учун, дунёга машҳур «Галкиниш» от спорти гуруҳи бу йил Монте-Карлода бўлиб ўтган 47-халқаро цирк фестивалида муваффақиятли иштирок этиб, олтин мукофотга сазовор бўлди. Бундан ташқари, Истанбулда бўлиб ўтган Халқаро этноспорт фестивалида ҳам муваффақиятли иштирок этган эди.

Туркман халқининг миллий етакчиси Ўзбекистон халқига чуқур ҳурмат-эҳтиром рамзи сифатида давлатимиз раҳбарига тўкин-сочинлик ва фаровонлик рамзи бўлган туя ва бўталоқни совға қилган.

Эслатиб ўтиш лозим, Ўзбекистон Республикаси Президентининг Туркманистонга амалий ташрифи доирасидаги тадбирлар кеча якунланган. Жумладан, Каспий бўйидаги «Аваза» туризм зонасида Шавкат Мирзиёев Туркман халқининг миллий етакчиси, Халқ Маслаҳати Раиси Гурбангули Бердимуҳамедов билан музокара ўтказган.

Ўзбекистон Республикаси Президенти Шавкат Мирзиёев, Туркман халқининг миллий етакчиси, Халқ Маслаҳати Раиси Гурбангули Бердимуҳамедов ва Озарбайжон Республикаси Президенти Илҳом Алиевнинг уч томонлама учрашуви бўлиб ўтган. Якунда Қўшма баёнот қабул қилиниб, қатор ҳужжатлар имзоланган.

Тадбирлар якунлангач, Туркманбоши шаҳри аэропортида Ўзбекистон Республикаси Президентини Туркманистон Вазирлар Маҳкамаси Раисининг ўринбосари Нокергули Атагулиев ва бошқа расмий шахслар кузатиб қўйди.

Шавкат Мирзиёев Тошкентга қайтиб келди.