Фанлар академиясининг Тарих институти директори Азамат Зиё Давра подкастида Ўзбекистоннинг «пахта колонияси» даври ҳақида гапирар экан, режиссёр Шуҳрат Аббосов томонидан суратга олинган «Отамдан қолган далалар» фильми нега узоқ йиллар тақиқда бўлгани ҳақида ҳам айтиб ўтди.

«Биз ҳалиям Шавкат Мирзиёев ўзбек халқини пахта қулчилигидан қутқарганини тушуниб етганимиз йўқ. Пахтага мажбурий меҳнат инсонларни саводсиз қилди, 9 ойлик ўқишининг 5 ойини пахтада ўтказадиган бутун бир саводсиз авлод пайдо бўлди.

1998 йилда давлат маслаҳатчи менга ‘бугун Ўзбекфилмга борамиз, Шуҳрат Аббосов Тўғай Муроднинг Отамдан қолган далаларини саҳналаштирибдиʼ деб айтди. ‘Мен нима қиламанʼ десам, ‘Юр, сен тарихчисан, иккаламиз кўрамизʼ деди. Кейин билсам буни раҳбар (президент) айтган экан, менинг фикримни билмоқчи бўлган экан», деган тарихчи.

Унинг айтишича, ҳамма розилик бергач, фильм намойишга чиқарилган, бироқ орадан бироз ўтиб, тақиқлана бошланган.

«Мен кейинроқ фильмни яна бир кўриб, сабабини тушундим. Мустамлака давридаги аҳвол мустақил бўлганимиздан кейин ҳам давом этгани учун бу кино кўрсатилмади. Миллий масала баҳона бўлди. Чунки ўша колхоз, ўша пахта колонияси, ўша мажбурий меҳнат мустақил бўлганимиздан кейин 25 йил ҳам қолди. Мана сизга «Отамдан қолган далалар» фильмининг бизнинг телеканалларда кўрсатилмаслигининг бош сабаби», деган собиқ Президент матбуот котиби.