Самарқанд шаҳрининг Чўпон-ота ҳудудида давлат-хусусий шериклик асосида барпо этилган янги Самарқанд автовокзалининг очилиш маросими бўлиб ўтди, деб хабар берди Самарқанд вилояти ҳокимлиги матбуот хизмати.

Қайд этилишича, 12 миллион АҚШ доллари миқдорида маблағ йўналтирилган автовокзал лойиҳаси замонавий архитектура, энергия тежамкор ечимлар ва хавфсизлик стандартлари асосида амалга оширилган.

Автовокзалда кенг ва ёруғ кутиш зали, она ва бола хонаси, болалар майдончаси, тиббиёт хонаси, электрон таблолар орқали қатновлар жадвалини кўрсатиш, имконияти чекланган фуқаролар учун махсус пандуслар ва йўлаклар, автобус, микроавтобус ва йўналишсиз таксилар учун алоҳида кутиш майдонлари, ҳайдовчилар дам олиш хонаси, автотранспортни техник кўрикдан ўтказиш хизмати, 24 соат ишловчи видеокузатув тизими мавжуд.

Ахборот матнида шунингдек, автовокзал нафақат транспорт маркази, балки кенг кўламли хизмат кўрсатиш ва савдо ҳудуди сифатида ҳам фаолият юритиши таъкидланган: У ерда 120 та савдо дўкони, 3 та замонавий ресторан, 14 та сервис шохобчаси, 1 та автосалон, 2 та меҳмонхона жойлашган.

Автовокзалнинг ишга туширилиши натижасида 300 нафар аҳоли учун доимий иш ўрни яратилган.

Вилоят ҳокими вазифасини бажарувчи Адиз Бобоев лойиҳанинг амалга оширилиши вилоятда транспорт хизматлари сифатини янги босқичга олиб чиқиши, шаҳарлараро, вилоятлараро ва халқаро қатновларнинг самарадорлигини оширши ҳамда аҳолининг вақт ва харажатларини тежашга хизмат қилишини таъкидлаган.

Самарқанд автовокзали келгусида нафақат Республика ичида, балки халқаро йўналишларда ҳам муҳим транспорт марказига айланиши кутилмоқда. Бу эса Самарқанд шаҳрининг логистика, транспорт ва сайёҳлик салоҳиятини янада оширади.