2 август куни ижтимоий тармоқларда «Марҳамат туманидаги 42-умумтаълим мактабида ҳашарми?» сарлавҳаси остида видео-хабарлар тарқалди. Унда бир гуруҳ педагоглар таъмирлаётгани акс этган. Ҳолат юзасидан Андижон вилояти мактабгача ва мактаб таълими бошқармаси расмий муносабат билдирди.

Унга кўра, 1982 йилда қурилиб, 2005 йилда жорий таъмирдан чиққан Марҳамат тумани «Янги ҳаёт» МФЙда жойлашган 42-умумтаълим мактаби 2023 йил «Ташаббусли бюджет» лойиҳаси асосида 1 миллиард 200 миллионлик қийматга эга эшик ва ромлар билан таъминланган. 2024 йилги мавсумда 1 миллиард 300 миллион сўм маблағ ютиб олиниб, спорт майдони қурилган ва мактабнинг олд қисми замонавий кўринишга келтирилган.

Жами 1 минг 236 нафар ўқувчиларга 74 нафар малакали устозлар таълим оладиган мактаб жамоаси билан суҳбатда улар томонидан ушбу ҳашар ихтиёрий равишда амалга оширилгани таъкидланган. Бироқ устозларни ўз лавозим мажбуриятидан ташқари ишларни бажариш ҳолатини назоратга олмаганлиги сабабли мактаб директори З. Мамажонова эгаллаб турган лавозимидан озод этилган.

Шунингдек, Камбағалликни қисқартириш ва бандлик вазирлиги Давлат меҳнат инспекцияси ҳам ҳолатни ўрганди. Унда мактаб директори ўқитувчиларни таъмирлаш ишларига мажбурий жалб қилгани, акс ҳолда дарс соатлари кам тақсимланиши айтилгани аниқланган.

Ҳолат юзасидан директор Мамажоновага нисбатан Маъмурий жавобгарлик тўғрисидаги кодекснинг 51-моддаси 2-қисмига асосан базавий ҳисоблаш миқдорининг 100 баравари (41 миллион 200 минг сўм) миқдорида жарима қўлланилган.