2 август куни бўлиб ўтган Олий Мажлис Сенати 9-ялпи мажлисида «Ўзбекистон Республикасининг айрим қонун ҳужжатларига аҳолига тиббий ёрдамнинг кафолатланган ҳажмига кирадиган хизматларни кўрсатиш, шунингдек, тиббиёт ва фармацевтика ходимларининг касбий фаолиятини амалга ошириш тизимини такомиллаштиришга қаратилган ўзгартиришлар ва қўшимча киритиш тўғрисида»ги қонун муҳокама қилинди.

Ҳужжат лойиҳасида қуйидагилар назарда тутилган:

▪️олий ёки ўрта махсус, профессионал тиббий таълим ташкилотларини тамомлаган ва давлат рўйхатидан ўтган шахсларгина тиббиёт ва фармацевтика фаолияти билан шуғулланиш ҳуқуқига эга бўлиши;

▪️ бирламчи тиббий-санитария ёрдами муассасаларида кўрсатиладиган тиббий ёрдамнинг кафолатланган ҳажмидан ортиқча тиббий хизматлар ва бошқа хизматлар қўшимча хизматлар сифатида баҳоланиб, улар пулли асосда амалга оширилиши;

Муҳокама жараёнида сенаторлар томонидан ушбу қонунда қайта кўриб чиқилиши лозим бўлган айрим масалалар мавжудлиги таъкидлаган.

Жумладан:

▪️ тиббиёт ва фармацевтика ходимларини давлат рўйхатидан ўтказишнинг асосий тартиб-таомилларини қонун даражасида белгилаш мақсадга мувофиқлиги;

▪️ қонунга тиббиёт ва фармацевтика ходимларини давлат рўйхатидан ўтказиш мақсади, асослари, рўйхатдан чиқариш асослари, бу ҳаракатларнинг оқибатлари, шунингдек, рўйхатнинг очиқ бўлиши, ундан аҳоли фойдаланиши каби масалаларни киритиш лозимлиги қайд этилган.

Бундан ташқари, «Норматив-ҳуқуқий ҳужжатларнинг ва улар лойиҳаларининг коррупцияга қарши экспертизаси тўғрисида»ги қонуннинг 14-моддасида маъмурий тартиб-таомилларнинг мавжуд эмаслиги маъмурий тартиб-таомиллар билан боғлиқ бўлган коррупцияни келтириб чиқарувчи омиллар жумласига киритилган.

Шуларни инобатга олган ҳолда мазкур қонунни қайта кўриб чиқиш лозимлиги тўғрисида Сенат қарори қабул қилинган.