Абу Райҳон Беруний номидаги Шарқшунослик институти олимлари томонидан «Улуғбек Зижи» (ёки «Зижи жадиди Кўрагоний») асари илк бор ўзбек, рус, инглиз ва хитой тилларида нашр этилди, деб хабар берди Фанлар Академияси.

Маълумот учун, асар XV асрнинг буюк астрономик мероси бўлиб, у Амир Темурнинг набираси, Мовароуннаҳр султони Мирзо Улуғбек (1394–1449) бошчилигидаги бир гуруҳ олимлар томонидан яратилган.

Асар тўрт қисмдан иборат бўлиб, биринчисида хронология ва тақвимлар, турли халқларнинг йил ҳисоби, иккинчи қисмда сферик астрономия ва математик география масалалари ҳамда математик ва географик жадваллар берилган.

Учинчи қисм сайёралар ҳаракати ва юлдуз астрономиясига бағишланган бўлиб, унда 1014 та юлдузнинг каталоги келтирилган.

Тўртинчи қисм астрология, яъни мунажжимлар башорати тавсифига оид.