Нумбео таҳлилий портали 2025 йил учун дунёдаги энг хавфсиз мамлакатлар ва ҳудудларнинг янгиланган рейтингини эълон қилди. Тадқиқот бутун дунё бўйлаб ўтказилган сўровномалар орқали тўпланган маълумотларга асосланган бўлиб, жиноятчилик ва хавфсизлик даражасини субъектив тарзда баҳолайди.

Янги ҳисоботга кўра, дунёдаги энг хавфсиз давлатлар рўйхатида Бирлашган Араб Амирликлари (БАА) етакчилик қилмоқда. Амирликлар шахсий хавфсизлик ва жамоат муҳитининг умумий барқарорлиги учун юқори баҳо олган. Иккинчи ўринда Андорра, учинчи ўринда Қатар жойлашган. Ўзбекистон 25-ўринда қайд этилган.

Энг хавфсиз мамлакатлар ва ҳудудлар ўнталиги қуйидагилардан иборат:

Бирлашган Араб Амирликлари;

Андорра;

Қатар;

Тайван;

Макао;

Уммон;

Мен ороли;

Ҳонконг;

Арманистон;

Сингапур.

Қайд этилишича, ушбу давлатлар ва минтақаларда жиноятчилик даражаси паст, аҳолининг ҳуқуқни муҳофаза қилувчи органларга ишончи юқори, ички вазият барқарор.

Ўзбекистон рейтингда 25-ўринни эгаллади. Озарбойжон 35-ўринни, Россия 52-ўринни, Қозоғистон 73-ўринни, Украина 81-ўринни, Қирғизистон 101-ўринни банд қилди. Туркманистон ва Тожикистон рейтингга киритилмаган.

Энг хавфли мамлакатлар рўйхатида Гаити биринчи ўринда. Кейинги ўринларда Папуа-Янги Гвинея, Венесуэла, Афғонистон, Жанубий Африка, Гондурас, Тринидад ва Тобаго, Сурия, Ямайка ва Перу жойлашган.

Маълумотларга кўра, ушбу мамлакатлар зўравонлик, кўча жинояти, талончилик, коррупция ва хавфсизлик ҳиссига салбий таъсир кўрсатадиган бошқа омиллар бўйича юқори балл олган.

Нумбео жиноятлар даражаси, кундузги ва тунги хавфсизлик ҳамда ўғирлик, ҳужум, вандализм, ирқий ёки диний зўравонлик қурбони бўлиш хавфини баҳоловчи фойдаланувчиларнинг жавоблари асосида Жиноят индекси ва хавфсизлик индексини тузиб чиқади.

Маълумотлар расмий давлат статистикасига эмас, балки сўровда иштирок этганларнинг субъектив иштирокчилар идрокига асосланганини тушуниш муҳим.