“Тошкент-Марказий” темир йўл вокзали кириш қисмигача автомобилда бориш имкони яратилди. Бу ҳақда “Ўзбекистон темир йўллари” матбуот хизмати хабар қилди.

Энди вокзалга келувчи йўловчилар, уларни олиб келаётган шахсий автомобиллар, таксилар ва бошқа транспорт воситалари тўғридан-тўғри вокзал кириш эшигига қадар ҳаракатланиши ва юк ҳамда йўловчиларни тушириб кетиши мумкин. Бунда қуйидаги тартиб белгиланган:

 – 5 дақиқа ичида кириб-чиқиш — бепул;

 – 5 дақиқадан 10 дақиқагача — белгиланган тўлов асосида;

 – 10 дақиқадан ошган ҳолатларда — жарима қўлланилади.

Жарималар инсон омилисиз, махсус камералар орқали аниқланади ва расмийлаштирилади.

Ҳозирда вокзал олди йўлаги қуриб, синов тарзида ишга туширилган. Шунингдек, кириш ва чиқиш қисмларида шлагбаумлар ва видеокузатув тизимларини ўрнатиш ишлари давом этмоқда.

“Ўзбекистон темир йўллари”нинг маълум қилишича, мамлакатдаги бошқа йирик шаҳарлардаги темир йўл вокзаллари ҳам босқичма-босқич айнан шу тизимга ўтказилиши режалаштирилган. Бу борада махсус йўл харитаси ишлаб чиқилган.