Ўзбекистон миллий терма жамоаси ҳужумчиси Элдор Шомуродов “Рома”ни тарк этиб, Туркиянинг “Башакшеҳир” жамоаси футболчисига айланди. У билан 2025−2026-йилги мавсум якунига қадар сотиб олиш опсияси билан ижара асосида келишув имзоланди.

Ўзбекистон миллий терма жамоаси ҳужумчиси, 30 ёшли Элдор Шомуродов Туркиянинг “Истанбул Башакшеҳир” жамоаси футболчисига айланди. У энди тўқ сариқ-ҳаворанг либосли жамоа сафида ўйнайди.

“Клубимиз Италиянинг “Рома“ жамоаси футболчиси Элдор Шомуродов билан 2025−2026-йилги мавсум якунига қадар сотиб олиш опсияси билан ижара асосида келишув имзолади”, дейилади “Башакшеҳир” хабарида.

Жамоа 2024-2025 мавсумда Туркия Суперлигасида 5-ўринни эгаллаб, Конференциялар лигасига йўл олган.

Transfermarkt маълумотига кўра, шартнома муддати 2026-йил 30-июнгача. Футболчининг жорий баҳоси 5 млн еврони ташкил этади.

Ўз навбатида, “Рома” футболчига омад тилади. У клуб сафига 2021 йил августда қўшилганди (ўшандан бери спортчи Италиянинг “Каляри” ва “Спетсия” клубларида ҳам ижара асосида ўйнаб қайтган).