ФИФА 10 июль куни ўзининг терма жамоалар бўйича рейтингини янгилади. Унга кўра Ўзбекистон миллий терма жамоаси 2 поғонага юқорилаб, 1449,12 очко билан 55-ўринда қайд этилди.

Миллий терма жамоа Осиёда Япония (17-ўрин), Эрон (20), Жанубий Корея (23), Австралия (24) ва Қатардан (53) кейин 6-ўринда бормоқда. Ўзбекистондан кейинги ўринларни Ироқ (28) ва Саудия Арабистони (59) эгаллаган.

Ўзбекистон аввалги рейтинг янгиланган кун – 3 апрелдан 10 июлгача 12,1 очко жамғарган. Бу даврда ўзбекистонлик футболчилар Жаҳон чемпионати саралашининг 3-босқичи доирасида меҳмонда БАА билан дуранг ўйнади (0:0) ва уйда Қатарни мағлуб этди (3:0).

БААга қарши ўйинда олинган 1 очко Ўзбекистонни ўз тарихида биринчи марта Жаҳон чемпионатига олиб чиқди.

Рейтингни Аргентина, Испания ва Франция терма жамоалари бошқариб бормоқда. Кучли ўнликдан, шунингдек, Англия, Бразилия, Португалия, Нидерландия, Бельгия, Германия ва Хорватия жой олган.

Ўзбекистон миллий терма жамоасининг ФИФА рейтингидаги энг юқори натижаси 45-ўрин бўлган. Жамоа бу ўринда 2006 йил 22 ноябрдан 2007 йилнинг 14 февралгача бўлган. Энг паст натижа1996 йил ноябрь ойида қайд этилган — 119-ўрин.