China State Construction Engineering Corporation компанияси Тошкент кўчаларининг кенг кўламли реконструкцияси учун $300 млн ажратади. Бу ҳақда деди пойтахт ҳокими Шавкат Умурзоқов маълум қилди.

Президентга «Ечимлар атласи» тақдимотидан сўнг Тошкент шаҳри ҳокими Шавкат Умурзоқов «Ўзбекистон 24» телеканалига интервьюсида пойтахт кўча-йўл тармоғини капитал таъмирлаш бўйича режалар ҳақида гапирди.

Унинг сўзларига кўра, China State Construction Engineering Corporation (CSCEC) Тошкент учун 300 миллион доллар жалб қилган ва бу маблағ кенг кўламли реконструкция ва таъмирлаш ишларига сарфланади.

«Бу маблағлар Шота Руставели кўчасида кенг кўламли реконструкция ва таъмирлаш ишларини амалга оширишга йўналтирилмоқда. Худди шундай, Тошкент шаҳрида 200 километр йўл ва тўртта йўлўтказгич қуриш ва таъмирлаш режалаштирилган», – деди ҳоким.

У эндиликда шаҳар кўчалари обод ва замонавий кўринишга эга бўлиши учун барча капитал ишлар кенг қамровли – фасаддан фасадгача амалга оширилишини таъкидлади.

«Ҳозир давлатимиз раҳбарининг топшириғига кўра, амалдаги қурилиш қонунчилигига тегишли ҳужжатларга ўзгартиришлар киритиш вазифаси қўйилди. Тошкент шаҳридаги йўлларини капитал таъмирлаш жараёнида кўчанинг икки томонидаги биноларнинг у деворидан бу деворигача бўлган барча ишлар амалга оширилиши керак», — деди Умурзоқов.

Илгари йўл ишлари фақат йўлнинг «қизил чизиғи» деб аталадиган қисмигача олиб борилган, бу эса кўпинча пиёдалар ва унга туташ ҳудудларни ободонлаштиришсиз қолдирган. Янги ёндашув ҳеч қаерни чекламай, обод ва уйғун кўчаларни яратиши керак.

Май ойида Тошкент ҳокимлиги Шота Руставели кўчасини комплекс реконструкция қилиш бўйича 50 миллион долларлик лойиҳа тақдим этган эди. Бу марказида автобус йўлагига эга биринчи кўча бўлади (илгари бу ерда трамвай ҳаракат қилган). Бир нечта «гармошка» автобусларини қабул қилиш учун бекатлар узун бўлади, уларга ўтиш жойлари ва светофорлар ўрнатилади. Чапга бурилиш жойлари ёпилади.