Ўзбекистон Республикаси Вазирлар Маҳкамасининг қарорига кўра, бугун, 1 июлдан бошлаб йўловчилар маҳаллий йўналишлардаги парвозларга шахсини тасдиқловчи ҳужжатларнинг электрон вариантидан фойдаланган ҳолда рўйхатдан ўтишлари мумкин бўлади, деб хабар берди Узбекистан Аирпортс матбуот хизмати.

Мазкур тартибга кўра, аэропортда рўйхатдан ўтишдан олдин йўловчи my.gov.uz сайти, мобил иловаси ёки «Ижтимоий карта» мобил иловасидаги шахсий кабинетига кириб, шахсий маълумотлар саҳифасига ўтади ва электрон шаклда шахсни тасдиқловчи ҳужжатларни рўйхатдан ўтиш жойидаги ходимга кўрсатади.

Жорий маълумотлар фақатгина my.gov.uz сайти, мобил иловаси ёки «Ижтимоий карта» мобил иловасидан кўрсатилгандагина шахсни тасдиқловчи ҳужжат сифатида қабул қилинади. Яъни, рўйхатдан ўтиш пайтида шу каби ҳужжатларнинг нусхалари, фотосуратлари, паспорт ё ИДнинг сканерланган вариантлари ёки шахсий маълумотлар бўлган веб-сайт саҳифасининг «скриншот»лари қабул қилинмайди.